"Ća su to za jeni ciklidi?"

"Ća su to za jeni ciklidi???" - me je pitala Ona kada je na izvodu od banke vidila uplatu za HUC... "Ća si vraga jopet trošija šolde za nike životinje... znaš da više nimamo kamo vrći sve to blaga ća stalno kupuješ..." joh, san njoj reka: "nisan kupija niš... san posta podupirač udruge!"

"Kega vraga...kakov podupirač??" - jopet guvori ona.... "Ma...", guvorin ja, "...to su ti neki dobri ljudi ća napro vole te ciklide... pak ih podupiren!". "Ah...štupido moj" mi je rekla "vero si štupido, svakega vraga ti podupireš i svakamo se rivaš... svi te za blago drže" (napomena autora: držati za blago je negativna stvar....držati nekoga za "budalu" u blažem smislu). Tu smo finili, san se štufa sve njoj objašnjavati... ni mi zamirila niš... nego me i ona jeno malo drži za blago... kako i svi u mojoj hiži... tri ženske, ni lako sa njima na kraj dojti. Rećite vi ća ćete, svako jutro ja lipu filu moran čekati za pojti pišati na miru... svaka se pituriva, maže...češlja i šprica sa svakakovin vragovima... a, ja bin samo poša pišati, a ne moren. Mi govori da načinin novi zahod samo za sebe u žgabucinu i bin ja, ma ne moren kada si tamo držin žohare... kamo da njih deložiran? kamo...svragon??

Da si ih stavin pod postelju?? Pena bi me oni put ona ubila Smiley
Najgore mi je kada najden na kadi svoj žilet sa kojin si brijen glavu... ma... porca puttana i svaki puta... i... jušto ti moj žilet moraju uzeti za si noge brijati... i... hm, ki zna ća si još briju sa mojin žileton za glavu...

"Ća su to za jeni ciklidi?"

Intanto... vani je još zma... jušo ove dana bura šiba kako nikada ni šibala... prokljeto je zima, ča je dosta čudno... ovako miseca marta (ožujka se reče ..ća ne) da u Puli pada snig. I ni za drugo, nego... brizan moj Gargantua se je zaželija i jeno malo sunca... jeno malo friških skakavaca Smiley a...kamo svragon da ih sada najden...
Akvarij mi je sav remengo, i nikako da ga refan... mislin si... forši bi bilo najbolje da sve zvadin vani... operen, pohitan ća ća su škovace, pak..pomalo... jopet sve spočetka.... samo, kako san... hahaha, po prirodi prokljeto ljen... nikako san si naša skužu da ću to delati kada jeno malo zatepli... a... kako je sada vani snig...neću još tako brzo Smiley Onaj drugi...sa slatkom vodom...e, njega je slagala odabrana ekipa i on je kako bonbon (i, bin ga ja slika...ali, neznan slikati a, moja Lupinica... nikako da je natentan... vajk njoj je sve drugo prija mene....sav van već povida da me doma drže za blago?). Lip je...stvarno je lipi i san dobija kozica (hvala ti puno puno...ako ovo citas Smiley ).... i već mi se množe... i san poša u grad njin najti najbolju hranu... ma, vero san kupija... jušto hranu za kozice... sada se i one guštaju!
Vraga, neznan ća bin više povidiva... čekan da finalmente fini ta munjena zima...da nan dojde jeno malo sunca...da se stepli i duša i tilo. Zajno se čovik puno bolje čuje kada je sunce... ovako... ni lako... allla šu, homo zdurati još i ti snig.... forši je zadnji za ovo lito.........

Zadnje na forumu

  • Tegla za cvijeće kao akvarij...
    23 Listopad 2019